"Mamá, quero ser mecánica"
"Mamá, quero ser mecánica" | |
---|---|
Decenas de compostelás elixen contracorrente profesións tradicionalmente masculinas. A elas, simbolizadas por Beatriz Rodríguez, dedicamos a portada deste mes da muller. Fonte – COMPOSTELACTUAL | |
Hai numerosas evidencias de que o clixé de xénero sigue presente na toma de decisións académicas e profesionais, unha reflexión chea de oportunidade neste mes de marzo no que se conmemora o Día Internacional da Muller. Beatriz Rodríguez Milán, 18 anos, estuda o ciclo superior de Automoción no Politécnico de Santiago. Quere ser mecánica. Sempre tivo o apoio da súa familia para elixir con liberdade a súa profesión. "Estou segura de que moitas mozas estarían dispostas a facer este ciclo, se non fose polo medo a como van ser aceptadas polos compañeiros", conta sorrindo. É a única moza nunha clase de 20 alumnos, "sempre me sentín unha máis". Cando remate os estudos, gustaríalle traballar nun taller e "no futuro, cando teña máis experiencia, montar o meu propio taller". No mesmo Politécnico, Rebeca estuda Carpintería, son so dúas mozas nunha clase de 23 alumnos. Outras colegas de centro, Cristina, Tania, Marta e Irene, estudan o ciclo de Sistemas de Telecomunicacións e Informática. Son as únicas catro mozas nunha clase de 22 alumnos. Son poucas, pero brillantes. "Temos as mellores notas da clase", contan divertidas. Extracto de COMPOSTELACTUAL, nº 10, marzo 2015 |