Ciberseguridade

Taller sobre extracción e análise de evidencias en dispositivos industriais no CIBER.gal 2025

No marco do V Encontro Galego de Ciberseguridade CIBER.gal, celebrado no Edificio Fontán da Cidade da Cultura, tivo lugar o xoves 6 de novembro de 2025, entre as 10:00 e as 12:00 horas, o taller titulado “Extracción e análise de evidencias en dispositivos industriais”.

A sesión estivo dirixida a estudantes e profesorado dos cursos de especialización en ciberseguridade IT/OT, así como a alumnado de Formación Profesional das familias de Electricidade, Electrónica e Informática, e a todas aquelas persoas interesadas na temática.

Durante o taller abordáronse cuestións como a problemática da extracción de evidencias en contornas industriais, a análise de evidencias en dispositivos de comunicacións e PLCs, e a xestión de evidencias en sistemas de robótica industrial.

A actividade foi impartida por Carlos Blanco, coordinador do Curso de Especialización en Ciberseguridade OT e profesor do Departamento de Electricidade e Electrónica do CIFP Politécnico de Santiago.